ظباط ٨ إبريل جناه أم أبطال

انا متضامنه مع ظباط ٨ ابريل ، اللي حبسهم حبس غيرهم كتير و بيحاول يدمر الثوره علشان كده نازله يوم ٨ يوليو و مش راجعه الا لما يطلعوهم و اللي قتل أي حد منهم يتحاسب. و الظباط دول محترمين و نزولهم يعني حكموا علي نفسهم بالإعدام الناس ده شجاعه جدا اشجع من اي حد تاني نزل الميدان و كل اللي شتمهم يقدر يقوللي هو ليه حد يضحي بحياته و مستقبله علشان يفتح عينينا علي الفساد داخل المؤسسه العسكريه. الحقيقه إن إحنا جبناء و مقدرناش نستحمل شجاعتهم ففي مننا خاف و قال ليه ينضموا لينا خليهم يتظاهروا جوه الثكنات.. يا سلام!! يا سلام !! علشان يتعدموا كده سكيتي! علي الأقل بخروجهم و تضحيتهم فتحوا عينينا.. شكرا يا ظباط يا شرفاء. إن شاء الله احنا هننزل و مش هتنرجع إلا لما تخرجوا علشان إحنا مش أقل شجاعه أو تضحيه منكو.. إحنا بنحب مصر زيكوا و عايزينها تنضف من المفسديين زييكوا . 

المحكمات العسكريه عار علي المجلس العسكري

تحديث

الكلام  ده
يدل علي إن اللي بيعترض علي المحاكمات العسكريه بيعاقبوه علشان كده كلنا كتبنا انهارده نعترض تضامنا مع القضاه الشرفاء.
شوية نقط نفكر فيها مع بعض. لما المدنيين بيتحاكموا عسكريا و القائد الاعلي للقوات المسلحه مبارك بيتحاكم مدنيا يبقي ده اسمه إيه و العذر عايزينها ثوره بيضاء. هو فيها أي ثوره في العالم نجحت بتحاكم الثوار نفسهم أيا كان لونها. طيب بيدفعونا ثمن مشاركتنا في الثوره؟ مثال: عمرو البحيري اتلفقتلوا قضية و خد ٥ سنين سجن. و التفاصيل موجوده في تقرير أمنستي انترناشيونال اللي علي لسان اعضاء المجلس العسكري ملهمش دعوه هي بتقول إيه يعني منظمات مأجوره. الاستدعاء للتحقيق في النيابه العسكريه للصحفيين و الناشطيين ثم الأدغال انها للدردشه لشرب القهوه تحت أي مسمي غير مقبول لأنه أرهاب للباقيين يعني باختصار لو أتكلمنا علي اللي بيحصل و فتحنا بقنا هنتجاب و اللي ملهوش ظهر ممكن يروح و ميرجعش. أنا عارفه ان المحاكمات العسكريه للمدنيين اللي أخذوا فيها أحكام مع وقف التنفيذ اللي اتقبض عليهم قدام سفارة اسرائيل سيف مسلط علي رقابيهم ممكن يتجابوا بيه في اي لحظه و يتفعل الحكم. طب احنا نسكت علي ده ليه؟ ان لم تكن دماء الشهداء غاليه عند المجلس العسكري ليحقق ما ماتوا من أجله فهي غاليه عند شعب مصر الذي بدأ ينفذ صبره. و عاد البوليس لضربه و اهانته و مات مواطن آخر من وطأ التعذيب بعد الثوره. مهما استخدمت الفزاعات من محاكمات عسكريه باطله للمدنيين فالشعب يفهم ما يحدث لقد قام بثوره و بذل الدم و لم يجني ثمرات الثوره الي اليوم. المحاكمات لرأس و رموز النظام بطيئه و فيها الكثير من المحابات للمتهمين بعدم تصويرهم او رؤيتهم في القفص و الي هذا الوقت لا يحاكم مبارك و أعوانه بتهم الفساد السياسي. القضاه يحولون للتحقيق التصريحات الاعلاميه لقد استحدث المجلس العسكري انتهاكات جديده مثل هذه و كشف العذريه لم تكن تحدث في عهد مبارك. لقد دخلتم في طريق لا رجعة فيه بانكار ان هذا حدث ثم العوده للاعتراف و تقديم أعذار مستفزه لماذا تم ذلك. عذر اقبح من ذنب. الشعب مبقاش يسكت و يخاف خلاص لا بفزاعة الاستقرار و لا الاقتصاد و لا الفتنه الطائفيه. إحنا عرفنا طعم الحريه و علمناها لأطفالنا اللي عمرهم ست سنين. أنا شخصيا قلت لبني البوليس اللي الشعب ضربه كان بيهين الشعب. اللي هيتحاكم عسكريا هيطلع عشره بداله فاهمين القضيه و مستعديين يضحوا عشانها لذا نصيحتي للثوار لا تيئسوا و استمروا في توعية الشعب و ربنا مبيضيعش حق حد. أما المجلس العسكري رسالتي ليه اعمل خروج مشرف سريع و سلم الحكم للثوار او حكومه منتخبه لأن لو الشعب نزل الشارع تاني مش بس اللي جاي هيروح منكوا دا انتوا كمان هتتحاسبوا علي اللي فات

الثوره هتفشل و لا لأ

الثوره الغير مكتمله بسبب تسرعنا في الخروج من الميدان في طريقها للفشل. المجلس الاعلي للقوات المسلحه صوره أخري قبيحه لنظام مبارك. انتهاكات تحدث في عهده لم تكن تحدث في عهد مبارك، منها كشف العذريه و قطع البرامج علي الهواء و طبعا هو مستمر بأمانه في نهج نظام مبارك في اهانة المتظاهرين و ضربهم بالرصاص الحي.أين تعهد شرف أمامنا في ميدان التحرير انه لو اخفق فسيعود لينضم لينا في الميدان؟ ألا يعتبر الدكتور شرف أنه أخفق عندما تخضع المصريات الشرفاء في عهده لكشف عذريه؟ ألا يعتبر إهانة و ضرب الثوار هي إهانه له شخصيا؟ الرهان الآن ان الشارع المصري سينتفض ثانية لحفظ حقوق من ماتوا من أجل العيش، الحريه، العداله الإجتماعيه ، الكرامه الإنسانيه و التي لا يري منها الشعب اي تحسن بعد الثوره. الشعب خايف لأن المجلس العسكري هدده و قالله  ما معناه إحمدوا ربنا إن إحنا معملناش  فيكوا زي ما  جيش ليبيا أو سوريا عمل في الثوار؟ طيب انا شايفه ان انهم مضربوناش وقت الثوره علشان الجيش كان هينقسم لكن استفردوا بالثوار بعدها و بيتسلوا عليهم. لعبوها بذكاء و عملوا نفسهم مع الثوره و هما بالظبط بل ألعن من نظام مبارك. النهارده المطلوب من الناشطين و الثوار و أي حد عارف انتهاكات انه يعمل توعيه و يعرف الشعب. و يلاقوا حلول عمليه أي حل يرتضيه الشعب للخلاص من المجلس العسكري في أسرع فرصه. و يعرضوها علي الشعب و بعد كده الكوره في ملعب الشعب، عايز يسترجل و يكمل الثوره اهلا بيه مش عايز إحنا كده كده مكملين شغلنا في التوعيه و العمل علي كل الأصعده. لأن إحنا لما بنعمل كده بنعمل كده علشان وجه ربنا. علشان بنحب بلدنا و علشان  دم الشهدا ميرحش هدر. دلوقتي محدش يحبط من موقف الإخوان لأن ربنا بيبينلنا معادن الناس في وقت الشده. و نذكر كلمة سيدنا علي.. انك لا تعرف الحق بالرجال و لكن تعرف الرجال بالحق.. يعني مش من الاسلام خالص يا إخوان إنك تري من يفتح النار علي أخيك المسلم و لا تفتح بقك بإنكار كأضعف الإيمان (من باب من رأي منكم منكرا).. و يا رب ينولنا الشهاده علشان منولنهاش اول مره ..و يسقط حكم العسكر!

الجيش و الشرطه ايد واحده

اللي حصل قدام سفارة اسرائيل اللي كلنا عارفينه و موثق بشهادات ده

و ده

شئ مالوش غير تعليق واحد. الشرطه و الجيش إيد واحده ضد الشعب المصري. أنا مش هطول عليكو. اللي زيي لم ينال شرف الشهاده قبل ١١ فبراير شايف ان ده فرصته انه يموت شهيد. اللي بيحصل للثوره اغتصاب، و مصرنا بيحكمها اللي اضطر يمثل انه بيحميها علشان السلطه اللي بقالها ٦٠ سنه في  إيديهم ما تروحش منهم. اللي بيحصل من محاكمات علي الفلوس و مش علي القتل للمصريين مهزله و إحنا(شعب مصر كله) مش مستعد يسامح في حق اللي ماتوا اللي اتعذبوا. و آخرهم اللي خد رصاصه في دماغه قدام سفارة اسرائيل. لو  قيادات الإخوان بيلعبوا لعبة ناخد اكبر مكسب ممكن ناخده منهم يبقوا بيراهنوا علي الطرف الخاسر. الشعب و الثوره هي اللي هتنتصر. انا كنت واحده من شابات الإخوان و هنزل يوم ٢٨ مايو أقول كل اللي بيتآمر علي البلد ديه مالوش أي مكان في السلطه! اللي بيحط وش أسياده أسود الثوره في الأرض و يشتمه و يضربه و يشتم الثوره و اللي يتفرج علي كده و هو ساكت من القوي السياسيه يبقي متواطئ مع المجرم و زيه في الإجرام. المصري اللي يشوف أخوه بيتهان و يسكت يبقي ربنا هيبعتله اللي يهينه حتي لو استخبي في بيته. البلد بلدنا و احنا اللي عملنا الثوره و ده مش انقلاب عسكري.يا مجلس يا عسكري يا طنطاوي الأحرار اللي انت جايب الشرطه تشتمهم من تاني هما اللي جابوك في السلطه و أفشلوا مشروع التوريث اللي كان مضايقك و مش عارف تحله إزاي علشان السلطه ما تتسرسبش من إيد الحرس القديم. الوضع كالآتي يوم ٢٨ مايو أنا نازله الميدان و هفضل في الميدان حتي لو كنا ٥٠. الموت بشرف أكرم ١٠٠٠ مره من العيشه بذل بعد التضحيات بتاعت اللي استشهد و اللي عينه راحت. يا مجلس يا عسكري انت مش قوي في حد ذاتك بدليل انكو معرفتوش توقفوا خطة جمال مبارك لسحب السلطه من ايديكوا. احنا، شعب مصر؛ اللي عملنا كده. و انت استعديتو شعب مصر بمعاداتكوا الصارخه للثوره و الثوار في كل افعالكوا بدءا من فض اعتصام مجلس الوزرا مرورا بفض اعتصام التحرير ٩ مارس و ٩ ابريل و كشف العذريه و التعذيب في المتحف و حركة المحافظين اللي كلهم لوآات شرطه و جيش و مكافئة مدراء الأمن اللي قتلوا الثوار و ترقيتهم زي اللي بقي مدير أمن الجيزه و المفروض بيتحقق معاه في قضية قتل الثوار و الإفراج عن سوزان مبارك بعد ما رمت ملاليم بالنسبه للي سرقوه مننا و المهزله بتاعت ابراهيم كامل اللي تهمتوه في انتهاكتكوا يوم ٩ ابريل و بعدين طلع منها و من  موقعة الجمل اللي هو محرض اساسي و موثق بالفيديو عليها و انتهاء بأحداث سفارة إسرائيل. لقد نفذ رصيدكم لدينا من زمان و حان وقت الإنسحاب بهدوء و من غير شوشره لأن فزاعة الطائفيه و الإقتصاد اللي بتحاولوا تخوفوا الشعب المصري بيعها علشان يمسكوا فيكوا و يقولوا في عرضكوا خليكوا في الحكم الحقونا مش هتنفع و مخالتش علي الشعب الذكي اللي فطرته الطيبه بوصلته علي الرغم من فقره و قلة تعليمه. امضاءات ايه اللي بتلموها ضد المجلس الرئاسي احنا كلامنا معاكوا في الميدان. المصريين يدوب ابتدوا الثوره علي الفساد. ٦٠ سنه فساد و تغلغل امن الدوله في كل بيت و مصلحه و شركه و جامعه مش حاجه سهله و هما لسه شغالين. مكن احنا قدها و قدود. عارفينكوا يا امن الدوله و عارفين ان المجلس الأعلي ادلكوا ضوء أخضر ترجعوا تشتغلوا تاني. لكن عندنا ليكوا خبر الشعب هو اللي يأمر دلوقتي. احنا لسه فيه مننا كتيير زعلانين لعدم نيلهم الشهاده و غيرانين من اللي خدوها في اول فصل في الثوره. تخيل ضعفك و انت بتدافع عن باطل و كرسي و سلطه قدام واحد طالب شهاده طالب جنه و عزه و كرامه. طالب حقه في عيش، حريه، كرامه انسانيه. ميعادنا ٢٨ مايو في كل حته في مصر و إذا شفته واحده مودعه بناتها و بتجري علي الرصاص ابقوا اقروا الكلام ده و افتكرو احدي الحسنيين النصر أو الشهاده لو لزم الأمر   .

كلمتين و بس

https://www.youtube.com/watch?v=KggNjrhr2dk&feature=player_embedded          شفتوا  ده

اتفرجتوا علي يسري فوده في اون و ابراهيم عيسي في التحرير انهرده بيتهايألي الثوره لسه بدري عبال ما تخلص

منقوول بس جامد

الحمد لله رب العالمين
و الله العظيم النظام ما سقطش
و الله العظيم النظام ما أتغيرش

و الله العظيم النظام مش هو حسني مبارك و لا الأشخاص اللي معاه

و الله العظيم النظام ما هيسقط و لا يتغير بحبس مبارك أو أعدامه هو و اللي معاه
ما عبد الناصر مات و ما فيش حاجة أتغيرت و السادات قال عبد الناصر لم يمت و السادات أتقتل و مافيش حاجة اتغيرت و حسني اتخلع و مافيش حاجة أتغيرت

ليييـــــــــــــه
لأن القوانين اللي حاكمة البلد قوانين فاسدة و متضاربة و قديمة من أيام محمد علي و المماليك كمان

شئ طبيعي انهم يخرجوا براءة لأن محدش طهر القضاء من القضاة اللي هو عينهم و اللي بتحوم حواليهم الشبهات

قاعدين بس نقول اناشيد عن القضاء النزيه مع ان فيه واحدة قبل كده واحدة ست و الله هي اللي قالت ان فيه قضاء منبطح فاكرها الست دي

و فيه أصلاً قوانين فاسدة تدعم الفساد و تخرج المفسدين براءة و العينة من ده

يبقي المحاكمات كلام فارغ لأن القوانين و القضاء فاسد بفساد من أنشأءه



ما ينفعش نتوضي بمياه وسخة

و الله العظيم ما ينفع انتي ما بتفهميش

انما يطهر الطاهر

مش ابوكي اللي قال يا اللي فتحت البتاع فتحك علي مقفول
لأن أصل البتاع واصل علي موصول

يعني و لا ألف مليونية هتغير حاجة

طالما ما فيش مبادئ واضحة أولها ان كل قانون دولي او محلي او قاعدة قانونية تخالف العدل فهو باطل و لا يعتد بيه

فيه مبادئ واضحة لتحقيق العدل لو عايزة تعرفيها نقول و نتكلم نتناقش حواليها و نتفق و كل الناس

يقوم الحال يتغير و العدل يسود و يبقي سهل محاكمة اي ظالم مبارك كان او غيره

انما كده هيتلعب بيكم الكورة و هيتجري وراكم زنقة زنقة دار دار و يقولوا امسك حلق قال ثوار

لييه لأن معندكمش مبدأ واضح و لأنكم وافقتم علي المحاكمات بقوانين غلط فاسدة و بأشخاص محققين أو قضاة أو أطباء أو نائب عام ليسوا فوق مستوي الشبهات



لابد قبل تطهير القوانين من تطهير الأشخاص كذمة مالية علي الأقل المجلس العسكري و طنطاوي و شرف و الوزراء و المسئولين و انا و انت و كل من عايز يتكلم عن الثورة لازم يعرف عن نفسه و أملاكه لازم يطهر نفسه و ان كان حد له عنده حق يديهولة و الناس الكذابة المتلونة اللي ما أعلنتش تبرؤها من الفاسد مبارك و سياسته الفاسدة مينفعش نتكلم معاهم اصلا و لا نقعد معاهم و نسمع منهم كلام عن الثورة و تحقيق العدل لأنهم كذابين و مؤيدين لأشخاص الفساد لم يتبرأوا منهم

يا ناس أفهموا

يارب يفهموني يارب يفقهوا قولي

يارب موفقين للخير

منقول من كومنت علي البلوج جبهة التهييس الشعبيه
ساعي الخيركتبه

و ده كمان مكتوب و الناس ابتدت تفهم و الحاضر يقول للغايب

hayat ank said...

كل الاحداث بتقول ان نظام مباركستان لسه موجود واحنا محتاسين حوسه سوده لان حاميها حراميهاوالى بيحصل دلوقتى تسجيد وخلاص النايم العام وبتاعى الكسب غير المشروع وبتاع المركزى للمحاسبات والشرطه لسه زى ماهيه وامن الدوله غيروا يافطتوا بس وحتى بتوعالطب الشرعى اديكى شفتى امبارح ايه الى حصل والافراجات هاتتوال والبرائات وكانك يا ابو زيد مغزيت فى كل المجالاات واحنا متقطعين فى كل حاجه والثوره بتتلاشى وافتكاسه الاعلان الدستورى زباله وعمرو موسى نازل بتقله وبيدعمه الحزب الزباله والى بيتحكم فى مقاليد الامور هم الحزب الزباله او الايدى الناعمه يا اما نعمل زى ناصر امين ما قال بتاع المركز العربى لاستقلال القضاء وحقوق الانسان ما قال ونعمل تطهير للقضاء والاعلام والشرطه ونعمل لجان شعبيه للمحاكمات بمؤسس قضائى ونطهلر كل مؤسسات الدوله يااما خلاص نعد فى البيت ونرضى باى عضمه يحدفوهالنا ونسكت وهايلعنا الشهداء من قبورهم فى كل كتاب ومحدش هايلومنا لان محدش هايعرف حاجه عننا لانها بقت الحاجه ثوره والناس حجت وخدت البركه وانتصرنا انتصرنا وخلاصيا اما المجلس العسكرى يتعدل كده ويسيب المتخصصين يشتغلوا صح يا اما يروح ويسيبنا احنا نعمل الى احنا عايزينه وماتتحججيش بالامن احنا عندنا الاف خريجين الحقوق 3 شهور دورات وهايبقوا زى الفل هى مش كيمياء لان الشرطه الى قاعده دلوقتى زى قلتها وبتستهبل وبتسيب المجرمين عالينا وانتى اول واحده كنتى بتقولى انهم يروحوا ونجيب سيد سيدهم وامن الدوله شغال زى الفل وشوفى الناس الى بيجيلها تهديدات والابتسامه الصفرا اول امبارح بتاعه كبير الاطباء الشرعيين الى بشرنا بان فى اخبار جديده والى قال ليسرى فوده ان الشاهد على الفساد حشيش ده هايتحبس ولم تمض ساعات وقدكان وطبعا انتى عارفه هم سلموا الجسس للمرتزقه علشان ما يرفعوش قواضى على مباركستان والحاج الى بيقول ان مبارك متضايق نفسيا ومش نافع يتحبس دلوقتى والحاجه مراته الى لسه قاعده والامراء مرتاتهم وسيل الافراجات الى هاينزل يرف وشوفى اليوم السائع بيقول ايه النهارده

مش هما دول الكدابين و لاد الايه بتوع حقوق الانسان

 و ادي هيومان رايتس واتش اللي هما طبعا بيقبضوا دولارات و بيتبلوا علي الجيش علشان هما كدابين و ملهمش اي مصداقيه في العالم و ميهمهمش صورتهم المهم يبوزوا علاقة الجيش و الشعب اللي هو الجيش اصلا معملش اي حاجه للشعب ده حتي انقذ الثوره، مش كده؟!!

http://www.hrw.org/ar/news/2011/04/29
جزء من المقال:

في 22 مارس/آذار أرسل اللواء إسماعيل عتمان رسالة إلى محرري الصحف المصرية ورد فيها "ضرورة عدم نشر أية موضوعات/أخبار/تصريحات/شكاوى/إعلانات/صور تخص القوات المسلحة وقادة القوات المسلحة إلا بعد مراجعة الشئون المعنوية وإدارة المخابرات الحربية والاستطلاع حيث أنها الجهات المختصة بمراجعة مثل هذه الموضوعات حفاظاً على أمن وسلامة الوطن".

ده معناه ايه؟!

اول بوست حقيقي هديه من الجيش

 منقول من http://egytimes.org/2011/04/egypt-ettman-militarycouncil/

 

و لقد اشارت اليه بثينه في التويت:

basboussa1 bothaina kamel

“@Shokeir: @nadotweets @basboussa1 ده اللي حصل في لقائي مع اسماعيل عتمان و اريد مواجهته علانية في وسائل الاعلام bit.ly/iPisei

يعني الكلام مش متلفق علي لسانها و هي مش بتكذب لأنها طلبت مواجهته اعلاميا علانية. ف ايه هيكون ردنا علي الإتهامات ديه؟

سقطات اللواء اسماعيل عتمان فى لقائة مع الاعلامية بثينة كامل – البنات والولاد كانوا بيناموا مع بعض فى التحرير

28 Apr 2011, written by Mohammed Maree 39 Comments

اسماعيل عتمان مدير ادارة الشئون المعنوية بالقوات المسلحة

من منا لا يعرف اللواء اسماعيل عتمان رئيس ادارة الشئون المعنوية بالقوات المسلحة واحد اعضاء المجلس العسكرى الذى يتولى ادارة البلاد للفترة الانتقالية ,  هو المتحدث الرسمىى باسم الجيش وكما نسمية نحن المسئول عن القاء بيانات الجيش التى يذيعها على الشعب المصرى ,قبل ثورة 25 يناير لم نكن نعلم اى شىء عن ادارة الشئون المعنوية ورئيسها اسماعيل عتمان اما بعد الثورة ونجاح الثوار فى الاطاحة بالمخلوع مبارك اصبح عتمان اشهر شخصية فى مصر , تخطت شهرتة نجوم السينما والطرب وهوليود كمان مش خسارة فية

اللواء عتمان وباقى اعضاء المجلس العسكرى يصرون على معاملة المصريين بنفس عقلية وطريقة النظام البائد , تجاوزات الشرطة العسكرية من تعذيب وضرب واعتقال وكشف عذرية للفتيات ومحاكمات عسكرية للمدنيين كلها وقائع مثبتة وادانتها منظمات حقوق الانسان المحلية والدولية ,لكن اللواء عتمان الوحيد  هو واللواء حمدى بدين رئيس الشرطة العسكرية ينكران كل هذة الانتهاكات ويقولون ان هذة ادعاءات باطلة تهدف الى تعكير صفو العلاقة ما بين الجيش والشعب

عن نفسى لم استغرب مما نشرتة الاعلامية المتميزة بثينة كامل على حسابها على موقع تويتر وما سمعتة منها مباشرة من خلال التليفون

فى البداية تقول الاستاذة بثينة ان الاستاذ ابراهيم الصياد رئيس قطاع الاخبار فى التليفزيون المصرى ابلغها ان احد اللواءات فى المجلس العسكرى اتصل به يطلب حضور بثينة الى (قصر)مقر هيئة الشئون المعنوية لمقابلة اللواء اسماعيل عتمان مدير ادارة الشئون المعنوية بالقوات المسلحة فى امر هام , سافرت بثينة الى قرية كفر سعد التابعة لمحافظة الفيوم لحضور مؤتمر هناك كان يهدف الى جمع توقيعات من المواطنين للمطالبة بالافراج عن المدنيين الذين احيلوا لمحاكمات عسكرية وكذلك للتحدث مع اهالى القرية بخصوص مشاكلهم الاقتصادية المزرية كما وصفتها بثينة , بعد انتهائها من المؤتمر رجعت بثينة الى القاهرة محملة بمشاكل اهالى القرية ومعاناتهم وذهبت الى ادارة الشئون المعنوية بالقاهرة , لم تنتظر كثيرا فبمجرد انتهائها من شرب القهوة نادى عليها احد الاشخاص وطلب منها ان تتفضل لمقابلة اللواء اسماعيل عتمان فى مكتبة , دخلت بثينة المكتب فرحب بها اللواء عتمان فسألتة عن سبب طلب الزيارة ,,قال ان يشعر ان لديها يقصد بثينة بعض التخبط فى الرؤى تجاة مواقف وقرارات الجيش والمجلس الاعلى للقوات المسلحة ويود كما قال لها ان يصحح بعض المفاهيم لديها بخصوص هذة الامور , قالت لة بثينة انها تحترم القوات المسلحة وترفض تخوين الجيش واكدت لة انها تحمل جينات حب للقوات المسلحة بدليل ان جدها كان احد المنتمين لهذة المؤسسة العريقة , فطلبت منة ان لا يغضب من نشطاء الفيس بوك والتويتر فيما ينشرونة بخصوص قرارات المجلس , قال ..انة لم يغضب منهم بالعكس هو سعيد بحواراتهم واكد لها ان اولادةوروة كما قال (الفاشتاج ) الذى عملة النشطاء على موقع تويتر بأسمة وكان سعيد بة رغم التجاوزات التى نشروها , كما ابدى اعجابة بالفيلم التسجيلى “سلمية ” الذى يتحدث عن شباب ثورة 25 يناير , واكدت لة بثينة على ان الشعب المصرى لا يريد دولة عسكرية او دينية او طائفية ويريدها دولة مدنية فقال لها ان القوات المسلحة هى مدرسة الوطنية المصرية وانة ليس هناك اتقى ولا اشرف من الجيش الذى اكد انة سيحافظ على تحقيق اهداف الثورة , فقالت لة يافندم انتوا كنتوا قاعدين فى مكاتبكم واحنا بناضل فى الشارع من سنين , فبدأت علامات الغضب تظهر على وجة اللواء عتمان واخذت المناقشة تأخذ شكلا من الحدة ,فقال لها انتوا مش هتعلمونا الوطنية , فقالت لة ان الشعب المصرى لن ينسى ان مدافع الدبابات كانت موجهة الى الثوار فى الميدان يوم 2 فبراير , قال لها انت مالك ومال الميدان انت ما كنتيش فى التحرير اصلا !! فنفت الاستاذة بثينة هذا الكلام واكدت لة انها كانت موجودة بالفعل , كلام عتمان مستفز

قالت لة ..ان الصباط المتورطين فى الكشف عن عذرية الفتيات يجب ان يقبض عليهم ويقدموا للمحاكمة , فكانت المفاجئة ان قال لها ان بتوع حقوق الانسان والثوار كانوا بيقبضوا بالدولار وان البنات والولاد اللى كانوا فى التحرير كانوا بيناموا مع بعض !! ؟ فاستثارت غضبا وقالت لة انت كدة بتطعن فى شرف بنتى وكل البنات اللى كانوا موجودين فى التحرير ,, طب لو كلامك دة صجيح ياريت تورونا السيدهات اللى عندكم اللى بتأكد دة  انا مش مصدقة اللى بسمعة ,, فأنهت المناقشة معة وهى تدمع ودفعت الباب خلفها بقوة وخرجت تقول لمن هم خارج المكتب ان مبارك موجود بالداخل

خرجت الاستاذة بثينة كامل وهى فى شدة الغضب فاتصلت بالاستاذ ابراهيم عيسى لتحكى لة تفاصيل ما حدث مع اللواء عتمان , فكان رد عيسى (المتوقع والمحترم ) انت لية مستغربة من الكلام دا متوقع ومستغرب انك اتفجأتى بردود اللواء عتمان

هذا باختصار شديد تفاصيل مقابلة الاعلامية بثينة كامل مع اللواء اسماعيل عتمان لكن فى النهاية سألت الاستاذة بثينة عن تقييمها لما حدث فقالت

ان عتمان هو من فلول النظام البائد وانة جزء من الثورة المضادة لانة مؤمن وعلى يقين بكل الادعاءات التى كان يروجها اعلام مبارك على الثوار ايام الثورة , واضافت ان  المشكلة الاساسية فى مصر الان هى وجود نفس العقليات القديمة التى كانت تحكمنا ,واكدت ان الاعلام المصرى بكافة انواعة لا يزال يتم التحكم بة – قبل الثورة كان يراقب من لجنة السياسات وامن الدولة وبعدها اصبح يوجة من قبل الشئون المعنوية – , فسألتها عن لماذا طلب اللواء عتمان مقابلتها هى تحديدا ,,قالت انة كان يأمل ان يستقطبها الى صف المدافعين على طول الخط عن قرارات المجلس العسكرى